Setki Ibraimi, tashmë emër i njohur në radhët e diasporës shqiptare në Austri, me titullin e nderuar Eu.Gemeinderat dhe vlerësimin Akademik e Ambasador, është më shumë se një përfaqësues institucional – ai është zëri i fuqishëm i besës shqiptare, i kulturës dhe i integrimit të qytetarisë sonë në botën europiane.
Gjatë këtyre ditëve të pushimit në Ilirid – Tetovë, ai është pritur me nderime të larta nga politikanë, profesorë akademikë dhe figura publike politike, të cilët e njohin jo vetëm për kontributin e tij në mërgatë, por edhe për përkushtimin e palëkundur ndaj çështjes kombëtare shqiptare, kudo ku jeton e vepron një shqiptar i denjë.
Në Stockerau të Austrisë, ai ka qenë dhe mbetet ambasador i vlerave shqiptare, promotor i integrimit dhe i edukimit, jo vetëm shqiptar, por edhe europian. Me veprat dhe iniciativat e tij, si nismëtar dhe bashkëthemelues i Shoqatës së Shkrimtarëve “Fan S. Noli” në Austri, Setki Ibraimi ka ngritur ura midis universiteteve, institucioneve kulturore dhe njerëzve intelektualë në diasporë. Ai ka mbështetur e përkrahur shumë shqiptarë në rrugëtimin e tyre drejt integrimit evropian, duke e kthyer fjalën në vepër dhe premtimin në realitet.
Por ajo që e veçon këtë figurë është modestia e tij e natyrshme dhe besnikëria ndaj fjalës dhe besës shqiptare. Ai nuk kërkon tituj për lavdi, por lavdinë e sheh në gëzimin e të tjerëve. Kudo që shkon, Setki Ibraimi e përfaqëson identitetin shqiptar me dinjitet.
Sot, kur ai ndodhet në vendlindje – Tetovë, në zemër të Iliridës, pranë popullit të tij – prania e tij është një dëshmi e qartë se integrimi europian nuk është vetëm çështje politike, por edhe frymë, që buron nga njeriu i thjeshtë por i përkushtuar. Prania dhe pranimi i tij me nderim nga figura të njohura të politikës dhe akademisë shqiptare është pasqyrë e respektit të ndërsjellë që ai ka fituar me vite pune të palodhshme në mesin e bashkëatdhetarëve.
Në emër të Shoqatës së Shkrimtarëve “Fan S. Noli” në Austri, e falënderojmë z. Setki Ibraimi për çdo gur që ka vendosur në themelet e bashkëpunimit kulturor, kombëtar dhe institucional, dhe i dëshirojmë shëndet, suksese dhe jetë të gjatë në misionin e tij për bashkimin shpirtëror dhe institucional të shqiptarëve me Evropën.
Nga Akad. M.Sc. Miftar Tërshnjaku, Kryetar i Shoqatës së Shkrimtarëve “Fan S. Noli”, Stockerau – Austri
