Real Madridi shënoi një fitore të lehtë 3-0 në udhëtim ndaj Leganesit pasditen e së dielës, duke ngushtuar distancën me liderin Barcelona në vetëm katër pikë. “Los Blancos” kishin detyrim të fitonin këtë takim, pas barazimit 2-2 të Barcelonës ndaj Celta Vigos një natë më parë.
Një nga golashënuesit e ndeshjes ishte Kylian Mbappé, i cili realizoi golin e parë për Real Madridin. Ndryshe nga ndeshjet e kaluara, ai u aktivizua në krahun e majtë të sulmit, një pozicion që ai e ka komentuar më pas në një intervistë të shkurtër.
“Mendoj se kam luajtur një ndeshje të mirë në një pozicion më ndryshe. Mund të luaj në çdo pozitë, thjesht dua të ndihmoj ekipin dhe të luaj mirë,” tha Mbappé pas ndeshjes.
Francesi gjithashtu foli për marrëdhënien që ka me partnerin e tij të sulmit, Vinicius Jr, duke e lavdëruar atë për ndihmën që ofron në fushë. Ai ka theksuar gjithashtu cilësinë e akademisë së Real Madridit, duke përmendur mbrojtësin e ri, Raul Asencio.
“Kam një raport shumë të mirë me Vinin. Lojtarët më të mirë janë këtu te Real Madrid dhe ne jemi të gatshëm të fitojmë,” tha ai.
“Jam paksa i befasuar, sepse nuk e dija se sa të talentuar janë lojtarët e Castillas,” shtoi Mbappé, duke treguar vlerësimin e tij për akademinë e klubit.
Me golin e tij ndaj Leganesit, Mbappé ka arritur nëntë gola në 17 ndeshje për Real Madridin këtë sezon, duke i dhënë fund një periudhe prej tre ndeshjesh pa realizuar.
